DEPARTAMENTO EDUCAÇÃO DIOCESE BAUCAU CONVOCA ENCONTRO HO DIRIGENTES ESCOLAS CATÓLICAS SIRA
Baucau_ Iha dia 4 de Fevereiro de 2023, Fundação São José liu hosi Departamento Educação Diocese Baucau nian realiza encontro nebé mak participa hosi; Administrador Diocesano Baucau, Presidente Executivo CONECTIL, Presidente Executivo Fundaçao São José, Diretor da Educação Municipal Lautém, Viqueque no Baucau, Diretor Departamento Educação Diocese Baucau no diretor escola católica sira nebé mak hamahan-an iha Fundação São José DB nia akos, iha salão São José.
Iha encontro ida ne’e Administrador Diocesano Baucau, Rev Pe. Alípio Pinto Gusmão hato’o palestra kona-ba saida mak escola católica ka educação católica. Pe. Alípio cita documento 2 igreja nian, hanesan: Gravissimum Educationis no Dicastério kona-ba Cultura no Educação, nebé mak koalia kona-ba educação católica, liu-liu educação católica nia fundamento bíblico, identidade escola católica no ponto crítico sira.
Presidente Executivo CONECTIL, Pe. Mateus Afonso haktuir história badak kona-ba razão bispo nain tolu harí CONECTIL no ninia função. Ho liafuan badak, Pe. Mateus Afonso dehan CONECTIL sai nudár ponte ida hodi liga entre Igreja Timor no Estado Timor iha área educação católica nian. Presidente Executivo CONECTIL mos informa ba diretor escola sira katak merenda escolar iha escola católica sira laos competência no serviço CONECTIL nian maibé ne’e programa governo nian no governo mak hala’o.
Presidente Executivo Fundaçao São José, Pe. Júlio Crispim relata kona-ba fundação São José ninia função iha Diocese Baucau no Diretor Educação Diocese Baucau, Pe. Hipólito continua hodi fo sai plano no programa sira nebé mak Departamento Educação halo ona no sei halo iha tinan ida ne’e.
Uainhira atu remata encontro, Diretores Educação Municipal sira hato’o mos programa educação no política governo nian kona-ba educação. Diretor sira mos hato’o sira nia sugestão balun atu nune’e escola católica no escola pública sira bele la’o hamutuk nafatin, especialmente ba CONECTIL no Ministério Educação Nacional atu iha nafatin linha de coordenação hodi nune’e escola católica ka escola pública bele hetan sucesso tanba estudante sira mesak timoroan.
Encontro nee participa ativamente husi Dirigentes atus ida tolu (103) durante loron tomak ida, remata ho sessão husu no hatan e almoço contraternização iha oras tuku 14.00 lorokraik.
Red- AS,DepMCS