SPES NON CONFUNDIT BULA DE PROCLAMAÇÃO JUBILEU ORDINÁRIO TINAN 2025

 

 

 

SPES NON CONFUNDIT

BULA DE PROCLAMAÇÃO

JUBILEU ORDINÁRIO

TINAN 2025

 

Papa Francisco

BISPO DE ROMA

ATAN HUSI MAROMAK NIA ATAN SIRA

BA EMA HOTU NEBÉ LE CARTA NE’E ATU ESPERANÇA HAKONU SIRA FUAN

(Tradução Tetun: Pe. Deonisio D’oFer  e Fr. Zeferino)

…………………………………………………………………………………………………

1. 1. Spes non confundit – Esperança nebé la bosok (Rm 5,5) ho sinal esperança mak apóstolo Paulo habelar coragem ba comunidade Cristã iha Roma. Esperança mak sai nudar mos mensagem central ba Tinan Jubileu nebé sei mai, tuir antiga tradição, Amu Papa proclama cada tinan ruanulu resin lima. Hau hanoin ba peregrinos de esperança nebé sei mai to’o iha Roma atu bele moris iha Tinan Santo ida ne’e no mos ba sira nebé la bele mai to’o iha cidade Apóstolo Pedro no Paulo, imi sei celebra iha imi nia Igreja local sira. Ba hotu hotu, momento encontro vivo e pessoal ho Na’i Jesus  “odamatan” salvação nian (cf. Jo 10,7.9); ho Nia, mak Igreja iha nia missão atu haklaken nafatin, iha nebé deit no ba ema hotu «ita nia esperança» (1Tm 1,1)

Ema hotu hein. Iha ema ida idak nia fuan, hafalun ho esperança hanesan hakarak ida nebé hein buat diak, apesar nia la hatene saida mak nia sei lori iha tempo aban. Buat nebé ita la preve iha tempo oin mai (futuro) bele hamosu sentimento nebé la han malu hanesan:  husi confiança ba tauk, husi serenidade ba desânimo, husi certeza ba dúvida. Dala barak ita hasoru ema nebé desanimado nebé haré buat hotu nebé sei acontece ne’e ho mata ceticismo no pessimismo, hanesan la iha ema ida nebé oferece ksolok ba sira. Atu Jubileu ida ne’e  bele sai ocasião ida nebé diak atu fo hikas ânimo ka hamoris fali esperança. Maromak nia liafuan ajuda ita atu hetan nia razão. Husik ita nia a’an atu Apóstolo Paulo lori ita hanesan nia lian hakerek, liliu ba sarani sira iha Roma.

Liafuan ida Esperança nian

2. «Wainhira dala ida ita justificado ona ho fiar, ita sente hakmatek ho Maromak liuhusi Ita Na’i Jesus Cristo. Liuhusi Nia no liuhusi fiar, ita acesso ba graça nebé ita hetan no fo glória iha esperança ho glória Maromak nian (…). Esperança ida ne’e la bosok (engana), tamba Maromak nia domin naksulin iha ita nia fuan liuhusi Espírito Santo nebé nia haraik ona» (Rm 5,1-2.5). São Paulo hakarak oferece mai ita ponto de reflexão barak tebes. Ita hatene katak Carta ba romano sira hatudu sinal passagem ida nebé decisiva iha nia atividade evangelizadora. To’o iha momento nebé nia hato’o iha parte oriental Império no ohin loron Roma representa ba mundo nia matan: desafio nebé boot, atu hasoru haklaken Evangelo ne’e nia naran, nebé la iha tan bareira no la iha tan fronteira. Igreja Roma laos Paulo mak harí maibe  nia iha hakarak ida nebé forte atu to’o uluk, hodi lori Evangelho Jesus Cristo nian ba ema hotu nebé mate no moris hi’as, nudar haklaken esperança nebé realiza promessa sira, introduz ba glória no  hatur iha domin nebé la bosok.

3. Tan ne’e, esperança mai husi domin no harí husi domin nebé sulin husi Jesus Cristo nia Futar Fuan nebé hedi iha cruz: « de facto wainhira ita sei inimigo, ita hadame malu tiha ona ho Maromak liuhusi Nia Oan nia mate, wainhira ita dame malu ona, ita sei hetan salvação liuhusi nia moris hias» (Rm 5,10). No Nia moris hi’as ida ne’e, hatudu liuhusi ita nia moris fiar nian, nebé hahú ho Batismo, haburas a’an ho graça Maromak nian tamba ne’e animado ho esperança nebé sempre hafoun a’an no haabut liuhusi Espírito Santo nia kbiit.

Tanba ne’e duni mak Espírito Santo, ho nia presença nebé metin iha caminhada Igreja nian, nebé estimula iha sarani sira, roman esperança nian: Nia mak continua halo lakan hanesan ahi oan nebé la mate, hodi fo apoio no suporta ba ita nia moris. Los duni, Esperança cristão iha realidade la bosok no la halo ema desanima  tamba hari iha certeza,  la iha buat ida no la iha ema ida mak bele hafahe husi domin divino: «Se mak bele hafahe ita husi Cristo nia domin?[…] neon susar ka terus, ema duni ka hamlaha, isin tanan ka susar, eh surik karik? […]. Maibe, iha buat ne’e hotu, ita manan graça ba ida nebé hadomi uluk ita. Tan ne’e, hau fiar metin katak  nem mate, nem moris, nem anju sira, nem nai-ulun sira, nem ohin, nem aban, nem aas, nem klean, nem naran criatura seluk ida nebé bele hafahe ita husi Maromak nia domin nebé iha ita Na’i Cristo Jesus (Rm 8, 35.37-39).  Tan ne’e mak esperança ida ne’e la hakiduk wainhira iha dificuldade sira: hatur iha fiar no hakonu ho caridade, ho nune’e moris ne’e la’o nafatin ba oin. Santo Agostinho hakerek: «biar moris oinsa ba, la bele ses husi   propensões ka orientações tolu: fiar, hein, hadomi»[1].

4. São Paulo mak ema nebé realístico. Nia hatene katak moris ne’e hafalun ho ksolok no terus sira, domin hetan prova wainhira dificuldade sira aumenta no esperança sente hanesan atu lakon perante situação terus no susar. Nune’e  mos hakerek:  «ita hahi a’an iha ita nia susar laran, tan ita hatene katak susar produz paciência, paciência fo kbiit maka’as nafatin, kbiit maka’as fo laran metin» (Rm 5,3-4). Ba apóstolo, terus no susar hanesan condição típica ba hirak nebé haklaken Evangelho iha contexto incompreensão no iha perseguição (cfr. 2Cor 6,3-10). Maibe iha situação ida ne’e duni mak liuhusi nakukun  hetan naroman: ita descobre  oinsá mak evangelização hetan nia força iha cruz no iha Jesus Cristo nia moris hi’as.  Ida ne’e, hamoris virtude nebé besik liu ba esperança: mak paciência. Ita toman ona hakarak buat hotu ho lalais, mundo ohin loron buat hotu lalais nune’e  lalais sai tiha constante ida iha ita nia moris. La iha ona tempo atu ita hasoru malu no dala barak liu iha família difícil tebes atu halibur malu no koalia ba malu ho calma.  Paciência ohin loron lakon,  lakon tamba buat hotu lalais no fo prejuízo boot ba ema. Mosu hahalok intolerância, nervosismo no dala barak hamosu violência nebé hahoris husi insatisfação no isolamento.

Iha tempo ohin loron, ho internet iha nebé espaço no tempo troca ho «agora no iha ne’e» paciência ita husik hela hanesan ita husik hela ita nia uma. Se ita seidauk iha jeito atu admira criação ita sei la compreende força husi paciência ne’e rasik.  Hein tempo troka malu atu fo nia fuan; hateke ba animal sira nia moris no nia book a’an sira; iha matan simples nian hanesan São Francisco  iha nia cântico da criação nebé hakerek iha tinan 800 ba kotuk, iha nebé nia compreende criação hanesan família boot, iha nebé nia bolu  loron hanesan “maun” no fulan bolu nudar “bin”[2]. Descobre paciência sei halo diak ba ita a’an rasik no halo diak mos ba ema seluk. Koalia kona ba paciência São Paulo bolu ita nia atenção kona ba importância husi perseverança (laran mentin) no confiança ba buat nebé mak Maromak promete ona ba ita, maibe uluk knanain  fo testemunha katak Maromak mak paciência uluk ho ita, Nia mak «Maromak perseverança no consolação nian» (Rm 15,5). Paciência mak fruto husi Espírito Santo nebé hamoris esperança no hametin liu-husi virtude e estilo de vida. Tan ne’e, ita aprende atu husu bebeik graça paciência, nudar  esperança nia oan no iha momento nebé hanesan nia sustenta. 

Dalan ida ba Esperança (Um caminho de esperança)

5. Husi cruzamento esperança ho paciência, resulta claro katak cristão ida nia moris ne’e hanesan dalan ida nebé precisa mos iha momento nebé forte atu habosu no hakbi’it esperança, nudar companheiro ida nebé insubstituível (la iha ida troka nia fatin) hodi hare ba ita nia meta; encontro ho Nai Jesus. Hau gosta iha hanoin ida dehan katak katak iha percurso graça ida nebé animado ho espiritualidade popular nebé antes ne’e anuncio ona iha tinan 1300 kona ba Jubileo dahuluk. Ita la bele haluha katak ho maneira oi-oin ita hetan ona graça nebé naresin ba povo santo nebé fiar iha Maromak. Ita hanoin hikas, exemplo «perdão» nebé sasukat laek husi São Celestino V wainhira nia haraik  ba ema hirak nebé hakbesik a’an ba Basílica de Santa Maria de Collemaggio iha rai Áquila iha loron 28 no 29 de agosto iha tinan 1294, molok tinan nen, wainhira Amu Papa Bonifácio VIII institui Tinan Santo. Igreja experimenta ona graça jubilar tinan misericórdia nian.  No antes ida ne’e, iha tinan 1216 Amu Papa Honório III simu pedido husi São Francisco nebé husu  indulgência ba ema hotu nebé visita  Porciúncula iha loron rua dahuluk iha fulan agosto. Nune’e mos peregrinação ba iha São Tiago de Compostela: nebé Amu Papa Calistro II iha tinan 1122, haraik atu celebra Jubileu iha Santuário refere iha ocasião celebração festa apóstolo Tiago nebé monu iha loron domingo. Diak tebes se ita continua ho modalidade celebração jubilares atu força no perdão Maromak nian sustenta no acompanha ita nia comunidade no nia emar sira.

La’os por acaso peregrinação exprime cada elemento fundamental husi evento jubilar. Wainhira ita la’o ka halo peregrinação ne’e tipicamente hanesan ema nebé ba no buka significado husi nia moris rasik. Wainhira ita halo peregrinação hodi la’o ain ita bele descobre valor sira husi silêncio, husi kolen no buat esencial sira. nune’e mos iha tinan oin, peregrinos de esperança sei la falta atu halo viagem ida ne’e iha dalan moderno no antigo sira, atu bele moris iha intensidade experiência jubilar. Nune’e mos iha cidade Roma, sei iha presença itinerário da fé  hamutuk ho  catacumbas sira iha Sete Igrejas. La’o husi rai ida ba rai seluk, hanesan  ita supera ona fronteira sira, passa husi cidade ida ba cidade seluk hodi halo contemplação ba criação no obra da arte sira nebé bele sai experiência osan mean ida nebé ita koko liuhusi cultura nebé la hanesan hodi lori mai ita ida idak beleza ka furak nebé harmoniza ho oração, lori ita atu agradece ba Maromak ba buat kmanek hotu nebé Nia halo. Igreja jubilar sira, iha percurso ida ne’e iha Cidade (Urbe), bele sai fatin (oasi) espiritual iha nebé  biban kmanek atu ita hadia fali ita nia viagem fiar nian, nebé haró ita ho wematan esperança nian, liu-liu hakbesik a’an ba iha sacramento reconciliação, nebé sai ponto de partida insubstituível ba dalan conversão nebé lós. Iha igreja particular sira, tenke tau atenção especial ba preparação nailulik sira nian no sarani sira atu Confissão sira no atu ema hotu bele acesso ba sacramento ida ne’e ho forma individual.

Iha peregrinação ida ne’e, hau hakarak convida particularmente ba Igreja Oriental sira, liliu ba sira nebé iha plena comunhão ho São Pedro nia saseluk. Imi nebé hetan sofrimento barak no dala barak liu to’o fakar ran hodi hatudu imi nia fidelidade ba Cristo no ba Igreja, ba imi particularmente imi tenke sente duni katak  Roma  nakloke ba imi hotu (bem-vindo a Roma), nebé sai hanesan inan ba imi hotu no rai didiak nia memória sira.  Igreja Católica, riku ho nia antiga liturgia, nia teologia no espiritualidade padres sira, monges, teólogo sira, nebé hakarak exprime simbolicamente acolhimento ita nia maun alin bin feton sira husi ortodoxos, iha tempo ida iha nebé hahú ona Via-Sacra, nebé dala barak ho obrigatório husik sira nia rain origem, sira nia terra santa, hodi halai ba nação nebé seguro husi violência no instabilidade. Ba sira, esperança hodi sente domin husi Igreja nebé la husik ka abandona sira maibe la’o tuir nafatin sira iha nebé deit sira la’o no haforça liu tanho sinal Jubileo ida ne’e.

6. Tinan Santo 2025 nudar tinan continuidade husi evento graça hotu nebé antes ne’e ita hetan tiha ona. Iha Jubileo Ordinário ikus liu (limiar) tinan rihun rua Jesus Cristo nia moris. Tuir mai, iha loron 13 fulan março tinan 2015, hau proclama jubileu extraordinário ho objetivo atu manifesta no husik ita atu hasoru malu ho «Rosto Misericordia» Maromak nian[3], anúncio central husi Evangelho ba ema ida idak iha tempo ida idak. Agora tempo to’o ona ba Jubileo foun, iha nebé atu loke fila fali Odamatan Santa hodi oferece experiência moris domin Maromak nian, nebé hamoris iha fuan esperança certeza ba salvação iha Cristo. Iha tempo nebé hanesan, tinan santo ida ne’e sei orienta ba dalan rumo no data fundamental ba sarani hotu. Iha tinan 2033 de facto ita sei celebra tinan rihun rua Redenção nian nebé realiza hodi comemora Jesus Cristo nia terus, mate no moris hi’as. Nune’e, ita sei hasoru percurso tapa importante hirak ne’e, iha nebé Maromak nia graça sei acompanha nia povo nebé la’o ho laran manas iha fiar, badinas iha caridade no perseverante iha esperança (cf. 1Tes 1,3).

Haforça husi experiência tradição nebé iha durante tempo naruk, no iha certeza katak iha Tinan Jubilar ida ne’e bele sai experiência de graça no esperança, hau estabelece Porta Santa Basílica São Pedro iha Vaticano nebé sei loke iha loron 24 fulan dezembro iha tinan 2024 ida ne’e. Nune’e hahú Jubileu Ordinário. Iha Domingo nebé tuir mai, iha loron 29 de dezembro iha tinan 2024 hau sei loke Porta Santa iha hau nia Catedral São João de Laterão, nebé iha loron 9 fulan novembro sei celebra tinan 1700 nia dedicação. Iha loron dahuluk fulan janeiro tinan 2025, Solenidade Maria Santíssima Maromak nia Inan sei loke mos Porta Santa iha Basílica Papal São Paulo Fora dos Muros. Odamatan Santo tolu ikus ne’e sei taka iha loron domingo 28 de dezembro iha tinan nebé hanesan.

Hau estabelece mos katak iha Domingo loron 29 fulan dezembro tinan 2024, iha catedral no co-catedral hotu hotu, Bispo diocesano sira sei celebra Eucaristia nudar abertura solene ba Tinan Jubileu nian, tuir Rito nebé sei prepara ba ocasião ida ne’e. Ba celebração iha Igreja Co-Catedral, Bispo bele troka ho delegado nebé designado. Peregrinação ba iha Igreja, hili ba collectio, la’o ba catedral mak sinal viagem esperança nian nebé, haroman husi Maromak nia Liafuan,  halibur fiar nain sira. Iha nebá, lee passagem balun husi Documento ida ne’e no fo sai (anuncia) Indulgência Jubilar nian ba sarani hotu atu sarani sira hetan graça ida ne’e tuir prescrições sira iha Ritual ba celebração Jubileu iha Igreja particular sira.  Durante Tinan Santo ida ne’e, iha Igreja Particular sira sei remata iha loron 28 de dezembro de 2025, husu atu sensibiliza participação máximo husi Povo Maromak nian tanto anúncio esperança graça Maromak nian nune’e mos sinal sira nebé fo sasin kona ba nia eficácia.

Jubileu Ordinário sei remata ho enceramento Porta Santa Basílica Papal de São Pedro, iha Vaticano, durante solenidade Epifania do Senhor iha loron 6 de janeiro de 2026. Atu naroman esperança  cristã ba to’o iha ema ida idak nudar mensagem Domin Maromak nian nebé hato’o ba ita hotu. Nune’e atu Igreja sai sasin fiel ba anúncio ida ne’e ba mundo tomak.

Sinal sira Esperança nian

7. Alem de hetan esperança iha Graça Maromak nian, ita mos hetan bolu atu descobre sinais dos tempos sira nebé Na’i oferece ba ita. Hanesan Concílio Vaticano II afirma: «ne’e mak dever permanente Kreda nian atu avalia iha tempo hotu-hotu sinais dos tempos sira no interpreta sinais hirak ne’e ho roman Evangelho; atu nune’e bele fo resposta de modo adapto ba geração ida-idak kona ba perguntas sira ema nian nebé husu kona ba sentido de vida presente no futuro no iha nia relacionamento recíproco»[4]. Tamba ne’e, precisa tau atenção ba buat diak barak nebé presente iha mundo ida ne’e, atu la bele monu ba tentação  no considera ita nia  a’an nebé domina ho buat a’at no violência.  Maibé, sinais dos tempos nebé contem saudades iha ema nia fuan nebé precisa presença Salvífica Maromak nian, husu atu nakfilak ba sinal sira esperança nian.

8. Sinal dahuluk esperança nian traduz ba Paz iha mundo, nebé dala ida tan ita hetan nia a’an mergulha iha tragedia funu nian. Haluha ba tragédia passada, humanidade sujeito ba dificuldade no prova foun sira iha nebé haré ba população barak mak hetan opressão husi brutalidade no violência. Sei iha tan povo balun nebé mak seidauk terus? Tansá mak sira nia hakilar desesperado ba tulun la dudu responsável nação nian atu iha hakarak hakotu conflito regional sira,  consciente ho nia consequência sira nebé bele hadet ba nivel global? Mehi barak liu  katak kilat sira sei nonok no para atu aumenta tan destruição no mate?. Jubileu fo hanoin atu sira nebé  «buka dame nune’e ema  sei bolu sira Maromak nia Oan» (Mt 5,9). Exigência ba dame, desafia ema hotu no exige ita atu tuir projeto concreto sira. Serviço diplomacia nia compromisso ho aten brani no criativo hodi harí espaço sira ba negociação ho nia objetivo buka dame nebé dura iha tempo naruk.

9. Hateke ba futuro ho esperança hanesan ita heteke ba moris nebé nakonu ho entusiasmo atu transmiti. Infelizmente, ita tenkenota ho tristeza katak iha situação barak perspetiva ida ne’e la iha. Consequência dahuluk mak  perda ka lakon  hakarak atu transmite vida. Tamba ritmu moris nebé para (frenético), tauk hare ba futuro, la iha garantia ba sira nia serviço no proteção social nebé adequado, husi modelo social sira nebé buka deit mak lucro no la cuidado iha relacionamento nebé ita hare iha nação oioin preocupa ho diminuição natalidade (queda da natalidade). Ao contrário iha contexto balun « fo culpa ba aumenta demográfico no laos  consumerismo estremo  e seletivo husi ema balun, nebé mak sai hanesan dalan  ida atu hasoru problema sira»[5].

Fo fatin ba moris ho responsabilidade materno no paterno  ne’e mak plano nebé Criador iha no hakerek iha mane no feto sira nia fuan no isin, missão ida nebé Na’i confia ba kaben nain sira no ba sira nia domin. Urgente katak, alem de empenho husi legislativo Estado sira nian, la falta apoio husi comunidade fiar nain no ba comunidade civil hotu ho nia componente tomak tamba foinsa’e sira nia hakarak atu hahoris oan mane no feto, hanesan fuan husi sira nia fertilidade domin, fo futuro ba sociedade ida-idak no sai nudar questão de esperança: depende ba esperança no gera esperança.

Tamba ne’e, comunidade sarani la bele sai segundo ba ema ida atu tane as necessidade aliança social ba esperança, nebé inclusivo no laos ideológico, no serviço ba futuro nebé marca ho labarik feto no mane sira nia hamnasa nebé mai atu enche fatin mamuk sira. Hotu-hotu, maibe iha realidade sira precisa recupera ksolok moris nian, tamba ser humano nebé Maromak cria tuir Nia Ilas no tanesan Nia (cf. Gen 1,26), la bele ho sobrevivência  ou moris nebé conforma deit ba tempo presente, haksolok a-an ho realidade material. Ida ne’e taka ita iha individualismo no harahun esperança, hamosu tristeza nebé maka metin iha fuan hodi halo ita neon nakraik no laran taridu.

10. Iha tinan Jubileu, bolu ita hotu atu sai sinal tangívelesperança nian  ba maun alin bin feton barak nebé moris iha condição  nebé susar. Hau hanoin kona ba dadur sira, nebé iha sira nia liberdade nebe limite, husi loron ba loron experimenta prisão nia todan, afetivo nebé mamuk,  restrições sira nebé impõe, no iha caso balun falta respeito. Hau propõe ba Governo sira atu tinan Jubileu ida ne’e, sira hola iniciativa atu restaura hikas ema sira nia esperança; forma de amnistia ou de perdão ba sira nia castigo nebé ho objetivo atu ajuda sira hodi hetan fali confiança iha sira nia a’an rasik no iha sociedade, percurso atu integra fali sira iha comunidade nebé corresponde ba compromisso concreto no cumpri mos lei sira.

Ida ne’e apelo antigo ida, nebé mai husi Maromak nia liafuan nebé hela ho nia valor sapiencial hodi husu acto clemencia no libertação nebé permite ita atu hahú fali «imi sei declara tinan limanulu nebé santo no imi sei haklaken libertação  iha rai ba habitante sira» (Lv 25,10).  Buat nebé estabelece iha Lei mosaica no Profeta Isaias  haktuir hikas  «Na’i haruka atu lori liafuan diak ba ema kiak sira, cura fuan nebé kanek, haklaken liberdade atan sira nian, fo liberdade ba dadur sira  no proclama tinan graça nian husi Na’i» (Is 61,1-2). Ne’e mak liafuan sira nebé Jesus halo tuir wainhira Nia hahú nia ministério, hodi declara iha Nia A’an rasik realização “tinan graça Nai nian” (cf. Lc 4,18-19).  Iha nação hotu hotu, fiar nain sira, liliu ba pastor sira sai intérprete ba pedido sira ne’e, hodi iha lian ida deit ho aten brani hodi husu condição digno ba hirak nebé dadur, respeito ba direitos humanos no li-liu halakon pena da morte, procedimento sira nebé contrário ho fiar sarani nebé bele halakon esperança konaba perdão[6].  Nune’e oferece ba dadur sira, sinal concreto proximidade, hau rasik hakarak loke Porta Santa ida ne’e iha cadeia ida atu nune’e bele sai símbolo ida nebé convida sira atu hateke ba futuro ho esperança no compromisso ba moris foun.

11. Sinal esperança ida ne’e mosoferece mos ba ema sira nebé moras, maske sira iha uma ka iha hospital. Sira nia terus bele hetan kma’an iha ema sira nebé visita sira no besik ba sira ho carinho nebé sira hetan. Obra misericórdia nian no obra esperança nebé book ema nia fuan sentimento de gratidão. Gratidão ida ne’e ba to’o mos iha serviço nain saúde sira hotu, atu iha condição difícil nia laran, sira bele hala’o sira nia knar hodi cura ho cuidado ho domin ba ema moras sira liliu ba ema mukit sira.

La taka matan mos ba sira nebé iha condição moris nebé particularmente kolen, experimenta sira nia fraqueza, liliu ba hirak nebé sofre patologia no desabilidade nebé limita autonomia pessoal. Ba sira, cuidado mak knananuk ba dignidade humana, knananuk esperança nian nebé exige sociedade tomak nia sincronização.

12. Sinal esperança nebé sira precisa hatudu a’an mos representa iha sira nia a’an rasik: Foin sa’e sira. infelizmente, dala barak sira nia mehi lakon. Ita la bele desanima sira: iha sira ita haré futuro nebé nabilan. Furak tebes, hare wainhira sira hasai energia, esemplo wainhira ho voluntário lolo sira nia liman hodi tulun situação calamidade no problema social! Maibe triste wanhira haré jovem barak lakon esperança; iha parte seluk, wainhira futuro la iha certeza no la hetan mehi sira, bainhira estado la oferece oportunidade ba sira no falta serviço estável nebé suficiente mehi ba sai diak la realiza iha sira nia moris. Nune’e la bele halai ses husi realidade ohin loron liliu baruk-ten no melancolia. Ilusão ba droga sira, risco transgressão nian no buka buat nebé la dun diak, cria confusão iha sira duque iha ema seluk no subar beleza no sentido moris nian, halo sira monu ba nakukun (abismo) no dudu sira hala’o gesto estraga sira a’an rasik (autodestrutivo). Ho razão ida ne’e, Jubileu mak oportunidade furak ida ba Kreda atu fo impulso ka dudu sira:  ho paixão nebé foun, mai ita tau-matan ba labarik sira, ba estudante sira, ba kaben nain sira, ba geração foin sa’e sira! hakbesik a’an ba foinsa’e sira,  ksolok no esperança ba Kreda no ba mundo!

13. Sinal esperança nian ida ne’e mos la bele lakon, wainhira ita hateke ba imigrante sira nebé husik sira nia rain hodi ba buka moris nebé digno ba sira nia a’an rasik no ba sira nia família. Atu sira nia mehi la bele estraga ho prejuízo no taka a’na sira; acolhimento, ha-lolo liman ba ema hotu tuir sira nia dignidade, acompanha ho responsabilidade, atu la bele nega ema ida nia direito ba moris diak iha futuro. Ba desterrado sira, deslocado, no refugiados atu iha controvérsia sira internacional nian nebé obriga sira atu halai hodi hases a’an husi funu, violência no descriminação atu sira iha garantia, segurança no acesso ba serviço no educação, instrumento necessário ba sira no sira nia inclusão iha contexto social nebé foun.

 

Comunidade cristã sempre pronto hodi defende ema kbiit laek sira nia direito. Mai ita hotu ho laran luak loke odamatan  hodi simu, atu  nune’e  la iha ema ida lakon esperança ba moris diak. Halakan iha ema nia fuan Nai nia Futar-liafuan, atu aiknanoik kona ba tesi lia ikus nian nebé dehan «buat hotu nebé imi halo ba hau nia maun alin maske kiik liu, imi halo ba hau» (Mt 25, 35.40).

14. Sinal esperança nian ida ne’e ba mos ferik katuas sira, nebé dala barak koko moris iha solidão no iha sentido de abandona nian. Valoriza riku-soin nebé sira iha, sira nia experiencia moris nian, matenek nebé sira iha no contribuição nebé sira bele oferece, no ida ne’e sai compromisso ba comunidade cristã no ba sociedade civil, nebé bolu atu serviço hamutuk ba aliança entre geração sira.

Hau dirige hanoin particular balun ba avo feto no avo mane sira,  nebé representa transmissão fiar no matenek moris nian ba geração foun sira. Atu sira hetan apoio gratidão husi oan sira no domin husi sira nia bei-oan atu sira bele hetan sira nia abut no hun lolos,  compreensão no  carinho.

15. Ho laran tomak hau harohan ba ema tokon ba tokon nebé moris iha kiak nia laran, nebé dala-barak falta necessidade atu moris. Perante kiak iha situação no laloran foun nebé lori risku atu sai ita nia toman no ita resigna a’an.  Maibé ita la bele  hateke ho matan sorin ba situação dramática ida ne’e, nebé ohin loron ita hetan iha fatin hotu-hotu, laos deit iha fatin balun iha mundo ida ne’e. Lor-loron ita hasoru ema kiak no ema mukit sira no dala barak iha ita nia uma tatís sira. Dala barak sira la iha horik fatin, no la iha hahan atu bele habosu ba loron ida. Sira terus ba exclusão no indeferência husi ema barak. Escândalo tebes se iha mundo ida ne’e nakonu ho recurso naturais sira nebé barak liu destinado ba arma, kiak sira mak «maioria….»[…] ema tokon ba tokon, ohin loron sira temi iha debate politica no economia internacional, maibe iha parte barak liu problema sira, sira tau hanesan acessório, hanesan questão ida nebé quase tamba obrigação ka ho maneira periférica, se sira la considera hanesan defeitos colaterais. Tuir lolós iha momento implementação concreta nian, dala barak ocupa iha fatin ikus liu[7]. Ita la bele haluha: kiak sira mak sempre sai vítima, la’os culpados.

Apelo ba esperança

16. Atu hatutan nafatin profeta uluk sira nia liafuan, Jubileu fo hanoin mai ita katak sasán sira be iha rai ne’e ema hotu nian, laos ba ema balu de’it nebé mak hetan previlégio. Sira nebé iha rikusoin barak tenke laran-luak, hanoin mos maluk seluk nebé mak precisa. Ha’u hanoin li-liu mak ema hirak nebé kuran bee no hahán: hamlaha ne’e nu’udar peste escandaloso ida nebé belit iha ita nu’udar humanidade nia isin no convida ema hotu atu reflete hamutuk. Ha’u hafoun fila-fali buat nebé ha’u dehan ona atu nune’e “ho osan nebé usa hodi sosa kilat no despesa militar sira seluk, ita bele harí fali fundo global ida hodi hakotu hamlaha no hodi desenvolve mos nação hirak nebé sei ki’ak, atu nune’e nia povo sira labele halai liu ba solução violento ka solução sira nebé nakonu ho bosok, atu nune’e sira la precisa husik hela sira nia rain hodi ba buka moris nebé digno liu”[8].

Ha’u hakarak halo tan convite urgente seluk ida relaciona ho Tinan Jubileu ne’e: ida ne’e dedica liu ba nação hirak nebé rico liu, atu sira reconhece decisão grave barak nebé sira foti ona no bele mos decide atu estabelece perdão ba tusan sira husi nação nebé labele selu fali sira. Além de magnanimidade, ida ne’e nu’udar questão justiça nian, nebé ohin loron sai aat liu tan liu husi forma desigualdade foun ida nebé ita hot-hotu conciente hela: “nia efeito mak, iha ‘dívida ecológica’, li-liu entre Norte no Sul, nebé liga ba desequilibrio comercial ho consequência iha âmbito ecológico nian no liu husi nação balu nia utilização recurso natural nebé la proporcional”[9]. Hanesan saida mak Bíblia hanorin ona, rai ne’e Maromak nian no ita hotu moris iha rai ne’e nu’udar “estrangeiro no bainaka” (Lv 15,23). Se ita hakarak duni ho laran atu prepara dalan ba dame, mai ita compromete ita nia an atu hadi’a causa sira husi injustiça, reformula didi’ak dívida sira nebé la justo no seidauk resolve, no fo han ema hirak be hamlaha.

17. Durante Jubileu nebé sei too mai, sarani hotu sei celebra aniversário ida nebé importante tebes: Concílio Ecuménico dahuluk nebé hala’o iha Nicea, sei celebra aniversário ba dala-1700. Importante tebes atu hanoin katak, hahú kedas husi tempo apostólico, Pastor sira sempre hasoru malu no tur hamutuk iha ocasião oi-oin liu husi assembleia hodi ko’alia kona ba doutrina no questão disciplinar sira. Iha século dahuluk sira fiar nian, sarani sira be iha Oriente no mos Ocidente halo sínodo barak tebes, hodi hatudu importância hodi hametin nafatin unidade Maromak nia povo nian no anúncio fiel Evangelho nian. Tinan Jubileu bele sai oportunidade importante ida atu concretiza método sinodal ne’e, nebé ohin loron sarani sira haré nu’udar expressão ida nebé importante los hodi halo evangelização: sarani hot-hotu, ida-idak ho nia carisma no ministério rasik, sente corresponsável duni ba finalidade ida de’it, atu nune’e sinál esperança nian sira bele fo sasin kona ba Maromak nia presença iha mundo.

Concílio Nicea iha tempo nebá iha missão atu prezerva unidade, tanba hetan ameaça makaas husi doutrina sira be nega Jesus Cristo nia divindade no Jesus nia igualdade ho Aman Maromak. Bispo sira quase nain atus-tolu mak marca presença iha nebá, halibur hamutuk iha palácio imperial nebé convoca rasik husi imperador Constantino iha loron 20 fulan maio tinan 325. Depois de debate oioin, hot-hotu ho graça Espírito Santo nian, reconhece hotu Símbolo Fiar nian nebé oras ne’e ita sei temi nafatin iha Celebração Missa cada Domingo. Padre Conciliar sira hakarak hahú Símbolo Fiar nian ida ne’e ho liafuan dahuluk mak “ami fiar”[10], hodi dehan, “Ami” ne’e hatudu sentido katak Kreda hot-hotu hamutuk iha comunhão ida de’it no hot-hotu professa fiar ida de’it.

Concílio Nicea ne’e nu’udar processo importante ida iha história Igreja nian. Iha nia aniversário ne’e, hakarak convida sarani sira hotu atu hamutuk nafatin hodi hahí no agradece ba Santíssima Trindade no particularmente ba Jesus Cristo, Maromak Oan, “nia-An ida de’it ho Aman”[11], nebé revela mistério domin ne’e mai ita. Maibé Nicea mos representa convite ida ba Igreja no comunidade eclesial sira hotu atu continua la’o nafatin iha dalan unidade nebé visível, atu labele kole hodi buka forma adequada sira nebé corresponde ho Jesus nia oração: “Atu sira hotu sai ida de’it, hanesan Ita, Aman, Ita hela iha Ha’u no Ha’u iha Ita; atu nune’e sira bele hamutuk ho Ita no mundo bele fiar katak Ita mak haruka Ha’u mai” (Jo 17,21).

Iha Concílio Nice ne’e ko’alia mos kona ba data atu celebra Páscoa. Kona ba ida ne’e, too ohin loron mos ida-idak ho nia posição nebé impede atu celebra hamutuk evento fundamental fiar nian ne’e (Páscoa). Husi circunstância providencial, ida ne’e acontece los iha tinan 2025 ne’e. Fiar katak ida ne’e bele sai hanesan apelo ida ba sarani sira iha Oriente no mos Ocidente atu foti dalan di’ak ida hodi celebra Páscoa iha data nebé hanesan. Importante tebes atu hatene katak, ema barak mak la hatene kona ba diatribe sira iha passado no la compreende didi’ak kona ba aspeto divisão hirak ne’e.

Kesi-an iha Esperança

18. Esperança, hamutuk ho Fiar no Caridade, forma tríptico “Virtude Teologal”, nebé exprime essência husi moris sarani nian (cfr. 1Cor 13,13; 1Tes 1,3). Husi sira nia dinamismo nebé labele fahe ne’e, bele dehan katak, esperança mak ida nebé fo orientação, hatudu direção no finalidade husi fiar-nain ida nia existência. Tanba ne’e, apóstolo Paulo convida ita atu “haksolok iha esperança, paciência nafatin iha susar-laran, metin iha oração” (Rm 12,12). Tanba ne’e, ita precisa nakonu ho esperança (cfr. Rm 15,13) atu ita bele fo sasin ho dalan credível kona ba fiar no domin nebé ita lori iha ita nia fuan; atu fiar ne’e bele sai ksolok, caridade nebé entusiasta; atu nune’e ema ida-idak bele oferece pelo menos hamnasa, gesto amizade, sentimento fraterno, hatene rona ho sincero, serviço gratuito, hodi hatene katak iha Jesus nia Espírito, buat hirak ne’e bele sai hanesan fini-di’ak esperança nian ba ema nebé simu. Maibé ita nia fundamento ba esperança ne’e mak saida? Atu compreende did’ak ida ne’e, ita precisa hanoin ho kle’an kona ba razão sira husi ita nia esperança (cfr. 1 Ped 3,15).
19. “Ha’u fiar iha moris rohan-laek”[12]: ida ne’e mak ita professa iha ita nia fiar, no esperança cristã hetan ponto apoio fundamental ida iha liafuan ne’e. Nune’e, “ida ne’e mak Virtude Teologal ida nebé ita hakarak (…) moris rohan-laek nu’udar ita nia ksolok”[13]. Concílio Ecuménico Vaticano II nian dehan katak: “se laiha base religiosa no laiha esperança ba moris rohan-laek, ema nia dignidade sei hetan estrago nebé grave, hanesan ita haré iha ohin loron, enigma sira moris no mate nian, sala no moras sira be laiha solução, buat hirak be dala barak lori ema ba desespero”[14]. Enquanto, ho virtude esperança nian lori ita ba salvação, haré mos ba tempo nebé lao ba oin nafatin, ita iha certeza ida katak historia umanidade nian no ita ida-idak nian la lao hela daudaun ba objetivo ida nebé laiha dalan eh rai-kuak nakukun ida, maibé orienta hela ita ba hasoru Na’i nia glória. Tanba ne’e, ita moris hodi hein hela Nia fila-fali mai no ho esperança katak moris nafatin ba Nia: ho espírito ida ne’e mak ita bele repete fila-fali invocação emocionante sira husi sarani dahuluk sira nebé haktuir iha Bíblia: “Mai, Na’i Jesus!” (Ap 22,20).
20. Jesus be mate no moris-hi’as ne’e mak nu’udar centro ba ita nia fiar. São Paulo, atu dehan iha liafuan badak (usa de’it verbo haat), transmite mai ita “núcleo” kona ba ita nia esperança. “Uluk-nanain, ha’u fo ba imi buat nebé ha’u rasik simu: Cristo mate tanba ita nia sala, tuir saida mak Bíblia dehan; haloot tiha nia isin-mate no liu loron tolu Nia moris-hi’as, tuir Escritura dehan, Nia mosu uluk ba Cefas no hafoin mak ba sira nain Sanulu-resin-rua” (1Cor 15,3-5). Cristo mate, hakoi tiha, moris-hi’as, mosu ba Apóstolo sira. Tanba ita, Nia passa liu husi drama mate nian. Aman nia domin halo Nia moris-hi’as ho força Espírito nian, halo Nia humanidade ne’e nu’udar primícia eternidade ida ba ita nia salvação. Sarani nia esperança hela lolós duni iha ne’e: wainhira hateke ba mate, sente hanesan buat hotu remata ona, liu husi Cristo nia graça nebé ita simu liu husi Batismo, ita simu fali certeza ida katak “Moris ne’e la remata, maibé transforma de’it”[15], ba nafatin. Liu husi Batismo duni mak ita simu moris foun ida hamutuk ho Nia nebé moris-hi’as, nebé harahun muro mate nian, considera mate nu’udar passagem ida ba eternidade.

No karik hasoru destino atu mate, nu’udar fahe-malu dolorosa nebé obriga ita atu husik ita nia maluk sira be ita hadomi, sei la iha retórica ida nebé possível, Jubileu ida ne’e oferece oportunidade ida mai ita atu descobre, ho gratidão tomak, ba presente moris foun nebé ita simu iha Batismo, nebé bele transforma mate nia drama. Importante mai ita atu hanoin fila-fali, iha contexto Jubileu nian ne’e, oinsá mak iha século primeiro sira fiar nian ema bele compreende ona mistério ne’e. Iha tempo naruk nia laran, sarani sira uluk nian harí bee-matan ba Batismo nian ho forma octagonal, too ohin loron mos ita sei bele haré no admira batistério antigo sira nebé sei mantém ho forma nune’e, hanesan iha Basílica São João de Latrão iha cidade Roma. Atu dehan katak, iha bee-matan Batismo nian ne’e, inaugura loron oitavo, katak loron moris-hi’as nian, loron nebé ultrapassa ritmo baibain nian, marca ho cadência semanal, nune’e loke ciclo tempo nian ba dimensão eternidade, moris ida nebé hela ba nafatin: ida ne’e duni mak objetivo ida nebé ita hotu haka’as an atu alcança durante ita nia peregrinação iha rai ne’e (cfr. Rm 6,22).

Sasin kona ba esperança nebé convincente los ne’e mak ita bele hetan liu husi Mártir sira, nebé metin nafatin iha fiar ba Cristo moris-hi’as, sira iha kbi’it atu renuncia sira nia moris rasik iha rai ne’e atu labele trai sira nia Na’i. Sira presente iha época hot-hotu no sira barak – no dalaruma iha ita nia tempo ne’e barak liu tan – sira nu’udar sasin ba moris nebé laiha rohan. Ita precisa conserva sira nia sasin atu halo ita nia esperança ne’e boot liu tan.

Mártir sira, nebé pertence ba tradição sarani oi-oin, nu’udar mos fini unidade nian, tanba sira exprime ecumenismo liu husi sira nia ran. Durante Jubileu, ha’u hakarak teb-tebes atu iha mos celebração ecuménica ida atu evidencia kona ba rikusoin sasin husi Mártir sira ne’e.

21. Então, wainhira ita mate ita sei sai oinsá? Ho Jesus, depois de limite mate nian, sei iha moris rohan laek, nebé consiste iha comunhão tomak ho Maromak, ho contemplação no participação iha Nia domin nebé la nahas. Buat hotu nebé ita tau esperança ba ne’e, ita sei haré iha realidade. Kona ba ida ne’e, Santo Agostinho hakerek: “Wainhira ha’u hamutuk ho Itaboot ho ha’u nia an tomak, ha’u sei la hetan tan moras eh susar ida. Ha’u nia moris sei sai moris ida nebé loloos, nakonu totalmente ho Itaboot”[16]. Saida mak caracteriza plenitude husi comunhão ida ne’e? Moris ho contente. Felicidadene’e nu’udar ema nia vocação ida, objetivo ida nebé ema hotu precisa alcança.

Maibé saida mak ksolok ne’e? Ksolok ida nebé mak ita hein no hakarak? Laos ksolok ida nebé lakon lalais, satisfação temporânea ida nebé bainhira hetan ona sempre buka nafatin atu hetan barak liu tan, sempre ‘hamlaha’ nafatin nebé ema nia klamar nunca bosu, sente mamuk bebeik. Ita precisa ksolok ida nebé mak realiza definitivamente iha buat nebé ita hala’o, katak iha domin, atu agora daudaun ita bele dehan: “Ha’u hetan domin, hafoin mak ha’u existe; no ha’u sei existe ba nafatin iha Domin ida nebé la desanima no Domin ida nebé laiha ema eh sasán ruma bele haketak husi ha’u”. Ita hanoin fila-fali liafuan nebé Apóstolo dehan: “Ha’u (…) convencido katak, mate ka moris, anjo ka ukun-nain, presente ka futuro, kbi’it-nain, foho-as ka rai-kuak, criatura seluk ida, sei labele hafahe ita husi Maromak nia Domin, nebé iha Jesus Cristo, ita Na’i” (Rm 8,38-39).

22. Realidade seluk ida nebé liga mos ho moris rohan-laek mak Maromak nia juízo, tanto iha ita nia existência nia rohan no mos tempo nia rohan. Dalabarak arte koko atu apresenta Maromak nia juízo – ita bele haré Michelangelo nia obra importante iha Capela Sistina – ne’e nu’udar adesão ida ba concepção teológica iha tempo nebá no mos transmite sentimento tauk ida ba ema hirak nebé mak haré. Di’ak mos mai ita atu prepara ita nia an ho conciência nebé moris no seriedade hodi hasoru momento ida nebé recapitula ita nia existência, iha tempo nebé hanesan hala’o ida ne’e ho dimensão esperança nian, virtude teologal ida nebé sustenta nafatin ema nia moris no la husik ema atu monu ba sentimento tauk. Maromak nia juízo, mak domin (cfr. 1Jo 4,8.16), bele baseia de’it ba domin, liliu buat hirak nebé ita pratica ou la pratica hasoru ema hirak nebé precisa liu, tanba iha sira mak Cristo juíz rasik hela ba (cfr. Mt 25,31-46). Tanba ne’e, juízo ida nebé diferente husi juízo ema nian sira no mos tribunal sira iha rai ne’e nian; ita precisa compreende katak ida ne’e nu’udar relação entre lialoos ho Maromak-domin no iha Nia an rasik mak mistério boot Misericórdia Divina hela ba. Iha Bíblia haktuir katak: “O hanorin o nia povo sira katak ema tenke habelun ho buat loos, no hanorin sabedoria di’ak ba o nia oan sira, tanba, depois de pecado, o fo conversão (…), atu nune’e, wainhira ita hasoru julgamento ita bele hein mos misericórdia” (Sab 12, 19.22). Hanesan Bento XVI hakerek, “iha momento juízo nian, ita experimenta no simu Nia domin nebé manán buat aat hotu iha mundo no nia domin be hela ho ita. Moras domin nian nakfilak tiha sai ita nia salvação no ita nia ksolok”[17].

Tanba ne’e, juízo ne’e mak salvação ida be ita hein no ida be Jesus haraik ona mai ita liu husi Nia mate no moris-hi’as. Ho objetivo ida atu ita bele hetan encontro definitivo ida ho Nia. Iha contexto ida ne’e, ema labele hanoin katak pecado nebé comete ona ne’e sei subar nafatin, maibé tenke hetan purificação, atu ita bele hetan dalan ida ba Maromak nia domin. Então, precisa tebes atu ita reza ba ema sira nebé mak hakotu ona sira nia viagem iha rai ne’e: nu’udar solidariedade iha oração intercessão nebé hetan nia eficácia ne’e iha comunhão santo sira nian, hodi kesi hamutuk ho Cristo, primogénito husi criação nian. Nune’e, Indulgência Jubileu nian, liu husi virtude oração, tau atenção liu ba ema hirak nebé husik ona ita, atu sira bele hetan misericórdia tomak.

23. Tuir loloos, Indulgência ne’e permite ita atu descobre Maromak nia misericórdia nebé laiha limite. Iha antiguidade, liafuan “misericórdia” ne’e bele mos troca ho “indulgência”, ne’e laos coincidência ida, tanba ne’e hakarak atu exprime plenitude husi Maromak nia perdão nebé la iha limite.

Sacramento Penitência assegura ita katak Maromak hamoos hotu ita nia sala sira. Nune’e, liafuan sira iha Salmo dehan: “Nia perdua o nia sala sira hotu, cura o nia fraqueza sira hotu, Nia mak salva o nia moris husi mate-laran no hakonu o ho graça no domin. (…) Na’i mak laran-luak paciente no nakonu ho domin. (…) Nia la trata ita hanesan sala-nain, Nia la castigo ita tuir ita nia sala. Nu’udar distância entre Lalehan no rai nebé boot, nune’e mos Nia favor ba ema hirak be hamtauk Nia. Hanesan Lorosa’e dook husi Loromonu, nune’e mos Nia hadook ita husi ita nia sala sira” (Sal 103,3-4.8.10.12). Sacramento Reconciliação ne’e laos de’it nu’udar oportunidade espiritual furak ida, maibé representa passo decisivo ida, essencial no indispensável iha ema ida-idak nia dalan fiar nian. Iha nebá mak ita husik atu Maromak halakon ita nia salan sira, cura ita nia fuan, foti ita no hako’ak ita, halo ita conhece Nia laran-lu’ak no compassivo. Atu dehan katak, laiha dalan di’ak liu atu conhece Maromak se ita la husik ita nia an atu reconcilia ho Nia (cfr. 2Cor 5,20), saboreia Nia perdão. Tanba ne’e, keta para atu confessa, maibé buka nafatin atu descobre beleza husi Sacramento ne’e nia cura no ksolok, furak husi hetan perdão ba sala sira.

Maibé, hanesan ita hatene liu husi experiência pessoal, pecado ne’e sempre “husik hela marca”, no lori mos ninia consequência sira: laos de’it consequência husi sala nebé comete iha exterior, maibé mos interior, tanba “pecado hot-hotu, maske venial, lori ho nia sinal desordenado ba criatura, nebé precisa hetan purificação, bele iha moris ne’e bele mos depois de husik hela mundo ne’e, iha estado ida hanaran Purgatório”[18]. Tanba, ita nia humanidade nebé fraco no fácil monu ba sala, hela nafatin iha “efeito residual sira sala nian”. Indulgência bele hasai, sempre liu nafatin husi Cristo nia graça, nebé São Paulo VI hakerek dehan “ita nia ‘indulgência”[19]. Penitenciaria Apostólica sei providência provisão sira nebé precisa atu bele hetan prática Indulgência Jubileu nian nebé efetivo.

Experiência ida hanesan ne’e nakonu ho perdão, keta taka fuan no neon atu perdua. Perdua la muda passado, sei la bele muda buat nebé acontece tiha ona; maibé, perdua ne’e fo oportunidade mai ita atu muda futuro no moris ho forma diferente, la ho ódio no vingança. Futuro ida nebé mak hetan roman husi perdão ne’e permite ita atu haré ba passado ho matan nebé diferente, ho hakmatek liu, maske ho matawen nafatin.

Iha Jubileu Extraordinário liu ba, ha’u institui Missionário Misericórdia sira, nebé sei continua nafatin atu hala’o missão importante. Sira sei continua nafatin sira nia ministério iha Jubileu tinan ne’e, fo fila-fali esperança no perdua nafatin ema sala-nain ida nebé hakbesik ba sira ho fuan nakloke no espírito arrependimento. Continua atu sai nafatin instrumento reconciliação nian ba, no tulun atu hateke ba futuro ho esperança fuan nian nebé mai husi Aman nia laran-lu’ak. Ha’u hein katak Bispo sira bele fo valor ba missionário hirak ne’e nia seviço ne’e, liuliu haruka sira ba fatin nebé susar atu hetan esperança, hanesan iha cadeia sira, iha hospital sira no fatin hirak be ema nia dignidade lakon, iha situação susar sira no contexto degradação sira, atu nune’e laiha ema ida mak lakon possibilidade atu simu Maromak nia perdão no consolação.

24. Esperança ne’e, hetan iha Maromak nia Inan, nia sasin nebé aas liu. Iha Nia, ita laos haré esperança ida nebé ideal maibe ida nebé presente duni iha realismo moris nian. Hanesan inan hot-hotu, Maria mos wainhira haré ba Nia Oan, Nia hanoin hela hotu ba futuro, no loos duni katak iha Nia fuan lori hela kanek husi liafuan nebé Simeão dehan iha templo: “Labarik ne’e sei sai nudar sinal de contradição ba ema barak iha Israel, surik ida sei sona boruk o nia fuan” (Lc 2,34-35). Iha Cruz nia hun, wainhira haré ba Jesus inocente nebé sofre no mate, maske hasoru sofrimento boot ne’e, Nia hatán nafatin “sim”, la lakon esperança no confiança iha Na’i. Ho nune’e, Nia coopera nafatin ho ita hodi cumpre buat nebé nia Oan dehan ona, wainhira fo sai katak Nia tenke “sofre maka’as no sei rejeita husi ulun-boot sira, husi na’ilulik boot sira no doutor Lei sira nian, sei mate no liu loron tolu sei moris-hi’as” (Mc 8,31), iha momento moras ida nune’e Nia fo an tomak hodi sai ita hotu nia Inan, Inan Esperança nian. Ita nia fiar populár continua invoca Nain Feto nu’udar Stella Maris (Estrela do Mar) ne’e laos coincidência ida, ne’e nu’udar título ida nebé expressa esperança segura ida, nebé iha momento difícil sira iha moris ne’e, Maromak nia Inan mai tulun ita, apoia ita no convida ita atu fiar metin no laran-metin nafatin.

Kona ba ida ne’e, ha’u ho ksolok hanoin mos katak Santuário Nain Feto Guadalupe nian, iha cidade México, prepara hela atu iha 2031 sei celebra aniversário ba dala atus-lima (500) aparição Nain Feto nian. Liu husi jovem Juan Diego, Maromak nia Inan hameno hela mensagem revolucionário kona ba esperança nebé too ohin loron sei dehan nafatin ba peregrino no sarani sira: “Laos ha’u be o nia Inan ne’e mak iha ne’e hela?[20]” Mensagem ida nune’e hela metin iha fuan, iha Santuário Mariano sira be namkari iha mundo, peregrino barak nia objetivo nebé confia sira nia preocupação ba Maromak nia Inan, sira nia sofrimento no tauk sira. iha Tinan Jubileu ne’e, hein katak Santuário sira sai fatin sagrado atu acolhe no sai fatin privilégio atu hamoris esperança. Ba peregrino sira be mai iha Roma, ha’u convida ita boot sira atu para mos iha Santuário Mariano sira iha cidade ne’e, atu venera Nain Feto no husu mos Nia proteção. Ha’u fiar katak ema hotu, liliu hirak be terus no laran taridu, sei bele koko inan nia domin no proximidade, nebé nunca husik nia oan sira; Nia, nebé sai hanesan “sinal esperança no consolação nian”[21] ba Maromak nia Povo santo.

25. Iha dalan ba Jubileu ne’e, mai ita fila-fali ba Sagrada Escritura no sente nafatin liafuan sira nebé dehan: “Ita be buka subar-fatin iha Nia, hetan encorajamento boot hodi kaer metin ba esperança nebé propõe ona mai ita. Iha esperança ida ne’e, nu’udar âncora nebé seguro no metin iha ita nia moris: nebé penetra liu véu santuário nian, nebé Jesus tama nu’udar ita nia percursor” (Heb 6,18-20). Ne’e nu’udar convite forte ida atu nunca lakon esperança nebé haraik ona mai ita, atu kaer metin hodi hetan refúgio iha Maromak.

Imagem âncora nian ne’e nu’udar dalan ida atu tulun ita hodi compreende estabilidade no segurança nebé ita hasoru iha ‘tasi’ moris nian nia laran, wainhira ita confia iha Na’i Jesus. Tempestade sira sei la manán, tanba ita kesi-an metin ba esperança graça nian, atu ita bele moris iha Cristo, sai husi sala, tauk no mate. Esperança ne’e, boot liu fali satisfação sira be ita hetan lorloron no condição moris nebé di’ak, lori ita hakat liu provação no hanorin ita atu lao la delek ba objetivo boot nebé bolu hela ita: Lalehan.

Tanba ne’e, Jubileu nebé sei mai ne’e nu’udar Tinan Santo nebé carateriza ho esperança nebé la hotu, esperança iha Maromak. Tulun mos ita atu descobre fila-fali confiança importante sira, iha Igreja no sociedade, iha relação interpessoal, relação internacional sira, iha promoção ba ema idaidak nia dignidade no respeito ba criação. Atu nune’e, sasin fiar-nain ida nian bele sai fermento ba esperança loloos nian iha mundo, haklaken Lalehan foun no rai foun (cfr. 2Ped 3,13), iha nebé povo sira moris ho justiça no harmonia, ho objetivo atu realiza Maromak nia promessa.

Husik ita nia an atu hela ho esperança, nune’e, liu husi ita, ema seluk mos bele hakarak atu hetan esperança ne’e. Husi ita nia sasin moris, bele dehan ba sira seluk: “Confia iha Na’i! Forte no aten-brani ba no confia iha Na’i!” (Sal 27,14). Hein katak força esperança nian bele hakonu ita nia presente, hein ho laran-metin Na’i Jesus Cristo nia fila hikas mai, ba Nia nebé ita hahí no fo gloria tinan ba tinan nafatin.

Roma, São João Laterão, Solenidade Acensão do Senhor Jesus Cristo, loron 9, fulan maio, tinan 2024, décimo segundo de Pontificado.

FRANCISCO

 

[1] Discursos, 198 augm., 2.

[2] Cf. Fonti Francescane, n. 263, 6.10

[3]  Cf. Misericordiae Vultus, Bula de proclamação do Jubileu Extraordinário da Misericórdia, nn. 1- 3.

[4] Const. past. Gaudium et spes, n. 4.

[5] Francesco, carta enc. Laudato si’, n. 50.

[6] Cf. Catecismo da Igreja Católica, n. 2267.

[7] Carta enc. Laudato sí, n. 49

[8] Francesco, Carta Encíclica Fratelli Tutti, 262.

[9] Francesco, Carta Encíclica Laudato Si, 51.

[10] Símbolo Niceno: H. Denzinger – A. Schönmetzer, Enchiridion Symbolorum definitionum et declarationum de  

    rebus fidei et morum, 125.

[11] Ibidem.

[12] Símbolo dos Apóstolos: H. Denzinger – A. Schönmetzer, Enchiridion Symbolorum definitionum et   

    declarationum de rebus fidei et morum, 30.

[13] Catecismo da Igreja Católica, 1817.

[14] Const. past. Gaudium et Spes, 21.

[15] Missal Romano, Prefácio dos defuntos I.

[16] Confissões, X, 28.

[17] Carta enc. Spe salvi, 47.

[18] Catecismo da Igreja Católica, 1472.

[19] Carta ap. Apostolorum limina, 23.05.1974, II.

[20] Nican Mopohua, 119.

[21] Conc. Ecum. Vat. II, Const. dogm. Lumen Gentium, 68.