FAMÍLIA NUDÁR IGREJA, Corpo Místico Nebé La’o Hamutuk
Ossú, 11 de Fevereiro de 2023_ Administrador Paroquial Pe. José Gonzaga hamutuk ho Conselho Pastoral Paroquial Ossú organiza seminário espiritual ho tema geral “Família e Corpo Místico de Cristo” iha salão comunidade Madre SCMM Ossú.
Molok orador Frei Dr. Joel Casimiro Pinto, OFM apresenta matéria, uluk na-nain Pe. José introduz objetivo hosi seminário ida ne’e, katak: Tema geral pastoral nebé mak Diocese Baucau decide iha plano triénio pastoral (2021-2023) mak “Comunga Cristo, moris hanesan Nia”. Iha tinan ida ne’e Diocese Baucau tomak sei reflete kona-ba sub-tema hosi tema geral mak : Família no Corpo Místico de Cristo. Tanba ne’e mak paróquia Ossú realiza seminário espiritual hodi nune’e bele haklean liu tan tema pastoral Diocese nian atu bele hala’o actividade pastoral ho diak no loos iha paróquia Ossú.
Tuir Frei Dr. Joel Casimiro Pinto, OFM nia hanoin kona-ba tema “Família e Corpo Místico de Cristo” ne’e luan teb-tebes no precisa tempo barak atu haklean. Tanba ida ne’e mak Frei Joel formula foun fali tema ne’e ho tema foun ida, mak: FAMÍLIA NUDÁR IGREJA, Corpo Místico Nebé La’o Hamutuk. Tema ne’e Frei Joel fahe ba liafuan tolu atu haklean: família, Corpo Místico no la’o hamutuk. Terminologia “la’o hamutuk” ne’e liga ho igreja sinodal. Ita hotu precisa la’o hamutuk tanba atu hala’o actividade pastoral iha Igreja laos padre no madre sira deit maibé ita hotu-hotu precisa la’o hamutuk. “Igreja sinodal ne’e fundamental teb-tebes no igreja sinodal ne’e mak igreja corpo místico”. Ita hanaran “Corpo Místico” tanba iha 1 Cor 12, São Paulo dehan: ita ida-idak hala’o papel hanesan ain ka liman maibé ita forma isin lolon ida deit mak Cristo nia Isin-Lolon rasik. Tanba ne’e, se ita la la’o hamutuk iha Igreja ka entre ita ne’e ida mak la hala’o nia papel, ita nia atividade pastoral mós sei la la’o.
Frei Joel hateten tan; ohin loron ita hasoru crise familiar tanba impacto hosi hegemonia cultura individualista no consumo. Acontece família nebé fahe malu, hamosu grupo single parent (hala’i hosi problema no decide lakohi kaben) no prefere hela hamutuk deit do que vincula ho matrimónio, etc. Realidade hirak ne’e hotu mosu tanba sira hakarak mesak (Unipessoaliza vida) no lakohi la’o hamutuk. Tanba ne’e família atu metin no la’o hamutuk nafatin precisa haré ba aspeto: domin, sexualidade, economia, comunicação no gestão familiar.
Seminário Espiritual ida ne’e participa hosi sarani, autoridade local, religioso/a, estudante no agentes pastorais sira paróquia Ossú nian. Seminário hotu tiha, sira taka ho celebração eucarística.
